بجد بجد واحشنى البلوجر

بجد واحشاني البلوجاية بتاعتى
حاسس انها شخص كان مسافر ورجع تانى ...
او صديق كان غايب عني
او حاجة ضاعت منى ولقيتها ....
يمكن علشان الواحد اتجوز وانشغل فى اكل العيش
اللى نظام وسياسة بلدنا سايقنا فى طريقه (البحث عن لقمة العيش)
مش عارف
حاسس انى لما اتجوزت بعدت عن كل حاجة وبالذات لما دخلت النت فى البيت
تقريبا مش بقوم من على الكمبيوتر الا على النوم
وبارجع من الشغل على النت على طول
ومع ذلك مش بادخل على البلوجاية بتاعتى
علشان بصراحة انا كنت زهقت من الكتابة دة سبب
والسبب التانى ان الواحد لما بيتجوز بيبقى فيه حاجات اهم انه يفكر فيها
بعيد بقى عن الرومانسية والواقعية والكلام المجعلص الكبير اللى كان بيقوله زمان
الكلام دلوقتى بقى ماشي فى سكتين مش اكتر
كلام الراجل مع مراته فى البيت على الحاجات اللى مالهاش لازمة اللى حصلت طول اليوم
وكلام الراجل مع اصحابه على القهوة او زمايله فى الشغل على اللى بيحصل فى البلد كل يوم
اشي مصايب بتحصل واشي فتنة بتحصل واشي واحد مختل عقليا مش عارف عمل ايه وللا قتل كام
واشي المرتب مش مكفى العيش فما بالك بالرفاهية ....
هيييييييييه دنيا ومادايم الا وجه الله ....
وحسبي الله ونعم الوكيل فى البعدا ولاد البعدا اللى عاوزين البلد تبقى مستهلكة مش منتجة ....
شوية انفلونزا الطيور علشان يقفلوا كل مزارع الطيور اللى فى البلد والناس تاكل طيور مجمدة ..
وشوية انفلونزا الخنازير علشان منظمة الصحة العالمية حاتدي كل بلد بتكافح 3 مليار دولار لمدة 7 سنين
وشوية انفلونزا الهسهس علشان الهسهس كتر عند الناس
وحاجة تقرف على الاخر....
وفى الاخر كل يوم والتانى اسعار اللحمة بتزيد والسكر بيزيد
وكل حاجة بتزيد
ومفيش حاجة بتنقص الا تمن البنى ادم فينا
مع ان البنى ادمين اللى عايشين برة البلد ليهم سعر (اقصد اوروبا والدول المتقدمة)
بجد بتوع تونس دول جدعان ....
انا كان نفسي اشوف ثورة فى يوم من الايام
والحمد لله ربنا ادانى اول امنية انى اشوف ثورة ...
يارب بقى الثورة اللى جاية تبقى فى المكان اللى كلنا قصدنا عليه ....
واما نشوف الثورة المفاجئة بتاعة يوم 25 يناير حايعملوا فيها ايه ...؟؟