اليوم يوافق الذكرى السنوية لفك الجبس
آه .... حاتقولى هوة الجبس كان ليه من الاول .... اقولكم انا بقى علشان موضوع الجبس دة كان ليه حكاية ظريفة قوى معايا
ماماتى اللى هيا امى يعنى من كتر ما كنت باجيبلها بنات علشان تشوفهم وتبارك الجواز
زهقت من اختياراتى علشان كدة تولت هيا بقى الموضوع بتاع انها تشوف عروسة تتناسب مع تفكيري وعقلى واتجاهاتى
علشان كدة قعدت بقى تسال اصحابها وقرايبها وفيييييييييييييييييين ربنا كرمها وشافت واحدة جارة واحدة صاحبتها المهم
راحت شافتها وعجبتها ولما رجعت قالتلى بقولك ايه يا ابنى انت .... قولتلها نعم يا امه ... قالتلى انت فاضى امتى .... قولتلها اشمعنى يعنى ... قالت ... شوفت لك عروسة وعاوزاك تيجي تشوفها
قولت انا ماشي ايه المشكلة فين وامتى ... قالتلى يوم الجمعة اللى جاية قولتلها الساعة كام ؟؟؟ ردت وقالت على الساعة سبعة كدة ... المهم قول رحت المعاد قابلت امى ورحنا انا وهيا فى بيت البنية اللى قالتلى عليها طلعنا عند صاحبة ماماتى وقعدنا نتكلم شوية .... جت البنية هيا وامها ..... وقعدوا يتكلموا وانا ساكت خالص بارد لما باتسال بس المهم مع كل سؤال ورد ورد وسؤال كنت بالمح البنية بتبص ناحيتي وكل شوية اقفشها بتبص ناحيتي المهم خدنا قعدتنا وقومنا ..... ولما روحت امى سالتنى .... هاااا ايه رايك .... قولت لها تمام .... شوفى بقى ايه النظام وقوليلي ..... مفيش على اخر الاسبوع لقيتها بتقولى البت عاوزة تشوفك قولت لها ماشي امتى .... قالت لى شوف ايه مواعيدك نظامها ايه .... قولتلها يوم الخميس باذن الله الساعة سبعة ونص ... المهم رحت يوم الخميس وقعدنا نتكلم والحكاية والرواية المهم انا مش فاكر الحوار بالضبط بس فى اخر القعدة قولتلها ها ايه رايك ... انفع ... البت بصت فى الارض وضحكت وانا كمان ضحكت ... المهم البت قالت بس انت صريح قوى وجرئ قوى ... قولت لها اشمعنى يعنى ... قالتلى علشان السؤال اللى انت سالته دة ... قولتلها اصل دة المفروض يتسال يعنى المهم هيا برضه سالتنى وانت ايه رايك ... قولتلها المفروض تكونى عرفتى يعنى ... قالتلى ازاى يعنى ... قولتلها يعنى من رودودى ومن افعالى ، ما اطولش عليكوا واحنا قاعدين اتفقنا انى ازورها كام زيارة كمان لغاية ما نتاكد من اختياراتنا ومشاعرنا زى ما الناس ما بيقولوا يعنى .... المهم فى الزيارة التانية قابلت اخوها وقولتله ايه النظام يا معلم ... قاللى احنا حانستنى شوية علشان عمى اللى هوة ولى امرنا وكبيرنا تعبان دلوقتى واول ما يخف يجي وتتكلم معاه وانا ما كدبتش خبر ووافقت على دة .... المهم بقى زيارة فى زيارة وفى يوم من الايام عرفت ان عمها اللى هوة ولى امرها اتوفى اتصلت بيهم وعرضت انى اسافر بلدهم علشان اعمل الواجب معاهم واستنيت تلات ايام ورحت لهم البيت علشان العزاء وعزيت فى عمها انا ووالدتى وسيبتها كام يوم كدة لحد ما فات بتاع اسبوعين على العزا وطبعا كل الوقت اللى فات دة كنت على طول معاها على التليفون المهم فى يوم كنت بازورهم وقولت لها كدة مش حاينفع لازم نتخذ خطوة ايجابية بقى علشان انا زهقت وبرضه مش باحب ادخل واخرج كدة من غير ما يكون فيه اى ارتباط رسمي المهم قالتلى استنى بقى عمى التانى علشان بيعمل عملية قسطرة فى القلب .... الاسبوع اللى بعدين باتلكم معاها فى نفس الحوار لقيتها بتقولى استنى بقى علشان خالتى بتعمل عملية دوالى فى الساقين .... الاسبوع اللى بعديه على طول مش عارف مين اتوفى عندهم فى البلد .... المهم بقى وصلنا لشهر مايو الحوار اصله بدأ فى شهر فبراير ... وفى اخر مايو كنت اتصلت بيها الصبح وكان يوم خميس وقولتها انا باذن الله جاى اخر النهار علشان نقرا الفاتحة باى شكل من الاشكال ونحدد يوم ننزل نجيب فيه الدبل
المهم يوميها بقى كنت باعمل كام مشوار فى وسط البلد ورجعت تانى على المنطقة علشان اعمل شوية شغل عند واحد صاحبي فاتح سايبر
لقيته نايم فى البيت اتصلت بيه علشان ينزل يفتح على بال ما اروح اعمل كام مشوار تانى وارجع اعمل شغلى اللى عندهم فى المحل .....
المهم لما رجعت لقيت بقى المصنفات فى المنطقة وماسكين صاحبي انا وقفت مع صاحبي جنب البوكس وباتكلم معاه لقيت بتوع المصنفات ماسكين واحد بتاع موبايلات عنده كمبيوتر وبيتخانقوا معاه المهم بتاع الموبايلات دة كان بلطجى راح متخانق مع الظباط راحوا العساكر جايين عاملين دايرة حوالين الواد وهاتك يا ضرب ... المهم اصحاب الواد عرفوا وكلهم باسم الله ماشاء الله بيلعبوا كمال اجسام راحوا مساكين الظباط والعساكر وعملوا عليهم دايرة وهاتك يا ضرب وفين يوجعك ..... ما تعرفش بقى ايه اللى بلغ القسم لقيتلك يا معلم بوكسين جايين من القسم وكل واحد نازل من العربية وساحب فى ايده الشومة بتاعته .... وانا وانا واقف بيني وبين العاركة اللى كانت دايرة باتفرج عليها بتاع من خمسين لسبعين متر واسمع فى ضهرى حاجة بتعمل فووو وابص يا جدعان الاقى شومة نازلة على دماغى ..... انا كل اللى عملته رفعت دراعى بس ... ومحستش باى حاجة غير وجع فى جسمى كله .... اتلمت الناس واللى طلع يجرى واللى اتسحب على القسم وانا قعدت فى مكانى زى ما ما انا كل اللى انا عاملة باجز على سنانى من الوجع وباقول آآآآآآآآآآآآه المهم اصحابي واقفين حواليا والاقى ابن خالتى جاى راح واخدنى المستشفى واعمل يا عم اشعة وادخل علشان تتجبس وطبعا ما اقولكوش بقى على اللى عملتوا فى الدكتور والتمرجية وهما بيجبسونى يا لاهوى يا امة على اللى حصل شتايم وتهزيق وشخر وكل ما لذ وطاب من قاموس الشيمة المصرى القبيح .....
راح ابن خالتى شايلني هيلة بيلة على العربية على بيتنا عدل وطول بقى ما الجبس بيبرد اسمع منى الحكم والكلام الجامد بقى ..... لا يامة مش انا اللى نحس دة هيا اللى نحس يا مة .... لا يا امة العيب مش فيا العيب فيها هيا يا امة .... ومن الكلام دة بقى كتير .... المهم الدكتور كان كاتب على مسكن كبسول معملش اى حاجة راحوا فى البيت بعتوا جابوا دكتور من المستشفى اللى جنب البيت بعد ما كشف راح مطلع امبولين مسكن وعشق يابا فى الوريد وفى العضل ونام يا عم بروكن زى القتيل وانت رافع دراعك فى الهوا ..... مااطولش عليكوا الناس عداهم العيب جم زارونى واخوها بقى بيقولى دلوقتى بعد ما دراعك اتكسر مافكرتش لو حصل الموضوع دة تانى ممكن تصرف على البيت منين .... اخوها بقى كان محامى رحت رادد عليه رد انقح منه يعنى انت لو حصل وانت ماشي فى الشارع رجليك اتكسرت وقعدت فى البيت شهرين وللا تلاتة مفكرتش حاتصرف منين الواد بصراحة اتفحم معرفش يرد .... بس انا فى الاخر قولت له بص يا اسامة محدش بيموت من الجوع ..... وربنا كريم .... وسيبها على الله ..... المهم كام يوم فاتوا بتاع شهر وفى اخر الشهر البنية بتكلمنى علشان ننزل نشوف الدبل وبعد ما اتفقت معاها على الميعاد حصل ان الفلوس اللى كانت معايا وشايلها علشان اجيب بيها الدبل حطيتها فى شغل وصادف بقى ان الشغل دة لما كنت حاسلمه كنت بفلوسه حانزل اجيب الدبل واعمل ليلة على الضيق فى بيت العرورة بس تقول ايه بقى فى تدابير ربك وعلى راى المثل انا اريد وانت تريد والله يفعل ما يريد .... بعد ما اديتها المعاد على الساعة تمانية بالليل يشاء ربك ان الشغل مش عاوز يخلص والماكينة اللى بتعمله باظت وبعد ما قعدت طول اليوم جنب الراجل وصلحنا الماكينة وعملنا الشغل ووديته لاصحابه الراجل صاحب الشغل انا ماشي من عنده الساعة سبعة ونص بالليل وطبعا لا اخدت فلوس ولا دياوله وطبعا رحت متصل بيها قولتلها مش حاقدر اجى النهاردة علشان عندى ظروف ...... قوم ايه بقى اخوها تانى يوم باكلمه بعد طلب منها قاللى اصرف نظر ..... بصراحة انا قولت احسن برضه لانها جوازة مش باين لها اول من اخر ومش عاوزة تتم من اساسه ..... وانا كنت عاوز اتاكد من كدة بس دفعت التمن غالى قوى .... فضلت فى الجبس من اول شهر ستة لاخر شهر عشرة ..... ودى يا ولاد كانت حكاية من حكايات واحد عاوز يتجوز ....
اشوفكم على خير بقى فى حكاية تانية باذن الله
