شوية فى الفضا

مش عارف فيه ايه مالى ... مابقتيش متابع اى حاجة فى اى اتجاه خالص... دة حتى الموقع اللى بادخل عليه ... اللى انا مراقب فيه يعنى ... مش متابعه خالص مش عارف مالى ... واعتقد انها مش حالتى انا لوحدى الحالة اللى مش عارف افسرها دى ... هيا زى ما تقول كدة حالة ملل على زهق على ياس على احباط على شوية اكتئاب على شوية انفصام على قليل من الانحباس العاطفى والشبق النفسي الى وجود امرأة كاي شاب يبحث عن عروس بعد ان مر على سن الثلاثون وبدأ يخطو نحو الخامسة والثلاثون بثبات ॥

هيا دى حالتى بالضبط ... بس على الرغم من كدة انا متفاءل ॥ مايغركوش الكلام اللى فات دة كله ... انا برضه لسة عندى امل على الرغم من القرار اللى انا اخدته بيني وبين نفسي انى بمجرد ما اوصل لسن ال 35باذن الله يعنى ابطل افكر فى مسالة البتاع اللي بيقولوا عليه جواز دة خااااااااااالص ...

مش عارف بقى انا باتكلم عن نفسي يعنى وطبعا اعتقد انى زيي زي اى واحد من الكام مليون واحد اللى فى مصر اللى عاوزين يتجوزوا واللى بعضهم اتجه للانحراف وللتحرشات الجنسية اللى بيتكلموا عنها ... اه الموضوع دة بصراحة انا كل ما ادخل على مدونة الاقى صاحب المدونة يشجب ويستنكر ويتنطط ويعمل مش عارف ايه وخاصة فى المدونات الخاصة بالبنات والستات وكل ما له علاقة بنون النسوة..... يا جماعة بدل ما تقولوا نشجب ونتنيل روحوا بصوا لروحكوا فى المراية الاول وبعدين تعالوا اشجبوا واعملوا..... ما هو اصل مش معقول يعنى الاقى واحدة ماشية فى الشارع النقاش داهنها فى البيت قبل من تخرج منه وماشية فى الشارع ببتقصع واروح رايح انا كدة لوحدى لا بيا ولا وعليا واروح واخدها على خوانة واتحرش بيها ... حبذا بقى لو انا بنى ادم منحرف اساسا ... وحتى لو قلتوا ان فيه بنات محجبات تم التحرش بيهم يا ترى بقى الحجاب بتاعهم دة شكله ايه .... ما هو الحجاب معروف يعنى وكتير قوى من البنات المحجبين الحجاب الصح ولا حد بيعبرهم فى الشارع اساسا لان شكلهم بيبقى باين عليهم ... دة حتى المنقبات محدش يقدر يقرب لهم على الرغم من اللى بنسمعه عن فئة قليلة من البنات المنقبات ... بلاش دة ودة تعالوا بقى نتكلم عن سيكولوجية البنى ادم المتحرش اللى اصدر فعل التحرش تجاه المتحرش بها ....(( حلو البقين العربي دول )) بداية احب اقول ان الانسان المدمن اللى بتعاطى مخدرات اساسا المخدرات بتعلمه الخوف لان بما انها شئ ممنوع فانه بيلجأ الى الاتجاه الى الادمان لكى يهرب من جميع الظروف والضغوط التى تمر بيومه السئ اساسا غير كدة كمان المخدرات عمرها ما كانت بتعلم الانسان الجرأة والجدعنة ودة خلاصة الكثير والكثير من الدراسات والابحاث المعملية والاجتماعية وكل الدراسات اللى الواحد سمع عنها دة غير تجاربه الشخصية اساسا ... ثم اساسا الناس اللى عملت موضوع التحرش دة عمرها ما تعمل كدة فى الاساس الا اذا كانت فايقة وانت فايق بتعمل المعجزات دة غير ان الشعب بتاعنا شعب مهياص غاوى هيصة ولما بيحصل اى حاجة وخاصة وسط الشباب تلاقى الشباب هاصت مع بعضيها على طول واحد مش عارف عمل ايه فى بنت تلاقى باقى الشلة على طول عاملين زيه ... وهوب بقى الموضوع تحرش ليه وليه علشان البت كانت لابسة مش عارف ايه ... الله يحرقكوا ماليتوا البلد .... نيجيي بقى لحاجة تانية حارقانى قوى الا وهو انى عاوز اتجوز بصراحة من بعد البت اختى ما خلفت البنت بنتها حبيبة

واللى هيا اساسا ننوس عين خالها اللى هوة انا يعنى انا من ساعة البت دى ما اتولدت وانا بقيت متحرحر على الجواز ومسروع بشكل رهيب وبقيت كل ما اشوف بنت فى اى حتة اسالها :: هوة الانسة مرتبطة ...؟؟ فى الشغل وفى الشارع وفى النادى وفى كل مكان بصراحة ومكلم اخواتى واصحابي وزمايلى فى الشغل وكل دة علشان البت الصغيرة بصراحة غيران من اختى دة غير اصلا ان اختى دى الصغيرة اللى بعدى على طول يعنى ... المهم بقى انا لقيت كدة وبقيت كل يوم والتانى اروح اشوف عرايس وبتاع وان شاء الله المرة اللى جاية ابقى احكيلكوا على اللى بشوفهم من العرايس .... انا اصلى باغير من برايد بتاعة بلوجر عاوزة اتجوز ... علشان كدة انا حاعمل مجموعة موضوعات عن العرايس اللى شفتها واللى حاشوفها من هنا لحد ما ياذن ربنا باذن الله ... وحاسميها عاوز اتجوز ....ها ها ها ها ها لامؤاخذة يا برايد