عاوز اتجوز والنبي يا امة

انا اللى خاللانى عاوز اكتب عن الجواز

البنت اللى اسمها برايد بتاعة مدونة عاوزة اتجوز

بصراحة انا شايف انها بتتكلم عن العرسان اللى بيجولها والمواقف اللى بتحصل لها معاهم ومع اهاليهم

قولت فى عقل بالى طيب ليه انا كما بقى ماكتبش عن العرايس اللى رحت شفتهم

حتى برضه كل واحد يعرض وجهة نظره فى الموضوع دة

على كل الحكاوى اللى حاحكيها هنا

مش مقيدة بوقت معين يعنى ممكن احكى عن اللقاء الاخير قبل اللقاء الاول وهكذا

يعنى محدش يتخض من عدم ترابط الزمان فى اللى حايتقال

نبدأ بقى على بركة الله

الواد اخويا الصغير اللى هوة اسلام اخويا اللى اصغر منى ب 12سنة جه فى يوم من المدرسة اصله مدرس موسيقى عقبال عندكم كدة

سالنى سؤال حلو قوى ... هوة انت لسة بتدور على عروسة ... رديت عليه وقولت ايوة اشمعنى يعنى بتسال ليه رد عليا وقال اصل انا فيه واحدة عندى فى المدرسة مسروعة على الجواز قولت اقولك عليها يعنى يمكن تنفعك ...... قولت له عندها كام سنة ؟ قاللى 24سنة سالته تانى ساكنة فين ؟ رد وقال فى الاميرية قولت له طيب ظبط بقى علشان اشوفها ، المهم فاتت الايام وجه فى يوم قاللى خلاص يا عم عاوزة تشوفك قولت له امتى ؟ ، قال يوم السبت اللى جاى حانروح نفطر معاها اصلها جايبة واحدة صاحبتها وانا بصراحة عاوز اتعرف عليها انى عارف انى من ساعة ما سبت الكلية وانا تعبان ملة قولت له ماشي المهم يوم السبت كان 6أكتوبر اللى فات روحنا ساعة الفطار وفطرنا عند مؤمن كانت هيا وصاحبتها وواحدة زميلتهم معاهم فى المدرسة اللى اسلام اخويا شغال فيها المهم رحت شوفت البنية واحنا ماشيين بقى قعدت اتكلم معاها والحكاية والرواية (بصراحة انا بطبعى دوغرى وصريح ومباشر بطريقة فظيعة يعنى ) المهم وهيا بتركب الميكروباص رحت سالها سؤال مفاجئ وقلت لها ياريت تفكرى ... وتردى على اسلام .... وراحت راكبة الميكروباص ومروحة على بيتهم ... المهم انا بقى روحت بيتنا عادى يعنى امى سالتنى ... عملت ايه .... قولت لها ولا حاجة عادى يعنى ادينا مستنيين .... كام يوم ورحت سالت اسلام اخويا الصغر اللى هوة يعنى اصغر منى ب12سنة ايه يا ابنى الاخبار لقيته بيقولى يا عم فكك منها دى هبلة .... قولت له ازاى يعنى .... رد وقال قالتلى معلش يا اسلام اخوك مش التيب بتاعى طويل قوى عليا ورفيع قوى واصلع خالص ...... لقيت امى بترد على اسلام وبتقوللى يا ابنى دى شركتك خالص ... قولتها انا عارف بقى بنات هبلة ولا متخلفين بلا وجع دماغ خالليها قاعدة جنب امها لحد ماتلاقى اللى هيا عاوزاه .... المهم انا نفضت للموضوع دة وسالت اسلام ابقى اسال بقى زميلتكم التانية اللى كانت معاكم قولها هانى بيقولك ايه رايك هوة عاوز يتقدم وكدة .... غاب كام يوم .... ورجع بيقولى دة كلهم هبل ومجانين سالته ليه يا ابنى قاللى سبب بصراحة متضايق منه قوى لغاية دلوقتى .... آل ايه اخوك طيب وانا مش عاوزة واحد طيب ...... اخويا الفقرى رد عليها وقالها طبعا ما انت عاوزة واحد يديكي على دماغك ...... بصراحة انا لما سمعت الكلمتين بتوع طيب وبتاع دول ..... دمى اتحرق وقولت لنفسي هوة الطيبة دلوقتى بقت عيب وقولت لامى ربنا يسامحك بتقولى ليه رحت قايل لها الحوار وكملت كلام لامى وقولت لها اهو لولا انك ربتينا كويس كان زمانا ولاد كلب اشرار وبتوع مشاكل ...... يعنى الطيبة بقت عيب دلوقتى ..... يا خسارة يا بنات مصر هوة الطيبة والصراحة والاستقامة بقت عيب اومال بقى الصفات السيئة بقت ايه حسنات .... فعلا الموازين اتقلبت والدنيا اتشقلب حالها ..... طيب دة حتى فيه حوالى 20مليون بنت مصرية فى سن الزواج مش لاقيين رجالة يستروهم ...... على كل انا عملت اللى عليا وان شاء الله ربنا يبعتلى نصيبي فى معاده ....

ارجو ان اكون مطولتش عليكم فى الحكاية الصغيرة دى بس ان شاء الله المرة اللى جاية احكيلكم عن العروسة اللى اتكسر فيها دراعى بجد حكاية ليها العجب ..... وعلى راى المثل شر البلية ما يضحك .....