الأحد، أغسطس 21، 2011

اخص عليك يا شعبي

اخص على دي بلد ..... يعنى قالوا مش عاوزين وزارة الداخلية اهو ... اهو مفيش لا ظابط ولا عسكرى فى الشارع وكانت النتيجة ايه ..... فوضى مرورية وامنية وسرقة نهب وضرب ..... قال الشعب عاوز تغيير قال ..... فعلا الشعب عاوز تغيير ...... تغيير الشعب نفسه... اخص عليك يا شعب... حرية ايه اللى انتو عاوزينها .... عاوزين ايه من الحرية حرية علشان كل واحد يمشي على مزاجه من غير قانون .... ويولع باقى الشعب .... لو كل واحد فكر كدة حاتولع البلد كلها .... كنا عاوزين ثورة علشان التغيير بس للاسف الثورة اللى انا شايف ان البلد محتاجها ثورة قوانين ... تحاسب المفسدين ....والفاسدين ... والحرامية والنشالين ... اللى سرقوا قوت الشعب واللى منعوا العلاج المجانى عن الشعب وخصصوه لفئة معينة من الشعب ..... زي واحد من الحرامية جايب صفقة عربيات اسعاف ب 12 مليار جنيه ....على اساس ان العربية بتصحى المريض لوحدها مثلا .... وللا بتروح المستشفى لوحدها ...12 مليار جنيه يا مفتريين .... دة غير المرتبات اللى بعشرات الالوف ازاى يعنى الكلام دة .... رشاوى ومحسوبية وسرقة مهلبية .... بس نرجع ونقول المثل اللى بيقول .... اذا كان رب البيت بالدف ضاربا فسيمةاهل البيت الرقص .... يعنى الحرامية الصغيرين دول سرقوا ليه علشان لقوا الفرصة للسرقة وللا علشان كبيرهم طلع حرامي .... عمل لنا حاجات اى نعم ... عمل لنا مترو الانفاق ... ودخل الانترنت مصر .... وادانا الفرصة اننا نتكلم .... والجرايد تكتب .... والقنوات تذيع .... بس برضه على راى المثل الكلاب تعوى والقافلة تسير .... بس برضه الغلط على الشعب لانه سمح له انه يوصل لكدة .... لسة فاكرين يا شعب ان السرقة استفحلت فى جتتنا وبقت وسط بيوتنا .... طب دلوقتى الحرامية الكبار اتقبض عليهم وبيتحاكموا والحرامية الصغيرين بقى مصيرهم ايه ... الموظفين اللى فى الحكومة اللى خلاص اتعودوا على الرشوة والهبة والهدية .... حايعيشوا ازاى .... ما هى الاسعار فى بلدنا بتطلع وما تنزلش .... نفسي فى مرة الاقى حاجة بترخص فى مصر غير البني ادم .... يا ريت يا شعب يا اخوانى واخواتى عاوزين تصلحوا من البلد صلحوا نفسكم الاول .... صلحوا تصرفاتكم الاول ولو الحكومة مصلحتش من نفسها ساعتها ننزل الف ميدان تحرير بالف الف بني ادم نطلب التغيير الصح

ليست هناك تعليقات: