توبيك كتبته على الفيسبوك بتاعى من زهقى
بما انه باقى حوالى 10 ايام على انتهاء شهر رمضان الكريم وبما ان الوضع الحالى لنا جميعا سواء اصدقاء على الجروب او اصدقاء واخوة على ارض مصر .... فقد رايت ان ابادر بالعودة الى روح الجروب ... الروح السياسي الذى كنت قد بدأت به ... الروح التى كنت افتقدها بعد مرور سبعة شهور على قيام الخضة.... نعم الخضة ... فما قام به اهل مصر فى 25 يناير 2011 لم تكن ثورة بل خضة .... خضها اتخضها مبارك لما لقى كل الناس فى الشارع بيقولوه انزل مش عاوزينك ..... زي فيلم فريد شوقى لما كان طالع مطرب وبيغني ويقول والله زمان ... زمان والله ... والجمهور مش عاجبه صوته ... لغاية مانزل بخناقة ... اهو دة اللى حصل بالضبط ... بس ايه الجديد .... الجديد بقى ان كل من كان يختبئ مثل الفئران والخفافيش فى الجحور المظلمة ظهرت تبحث عن دور على خشبة المسرح ... واذا كان فيه حد بيقول ان البلد رايحة على منعطف مش عارف ماله ... بقول ان المجلس العسكرى هوة السبب فى اللى بيحصل دة ... وللاسف كون ان الثورة .. عفوا .. الخضة كانت بلا قائد فدة ادي الى ان مفيش حاجى بتم رؤوس النظام بتتحاكم لكن النظام موجود كل شئ زي ما هو الرشوة موجودة والمحسوبية موجودة والاستغلال موجود والمتاجرة باقوات الناس موجودة ومستمرة والبيروقراطية موجودة ... مفيش حاجة اتغيرت غير ان مبارك مشي والمجلس جه ونظيف مشي وشرف جه ... مفيش جديد ... انا مش بحرض على المجلس العسكرى علشان محدش يقول انى بحاول اوقع بين الجيش والشعب ... انا لا انا ناشط سياسي ولا منضم لحزب جديد .. ولا انا قائد فى شغلى ولا اي نيلة ... انا مجرد متفرج متفكر ... ايام مبارك الواحد كان ممكن يتكلم ويقلب الموضوع تهريج فى الاخر علشان مايروحش ورا الشمس ... دلوقتى حتى لو قلبته تهريج حايحاكموك ... المجلس العسكرى افتكر نفسه الوصى على الشعب المصري .. وللاسف ماختلفش كتير عن مبارك ... كان فين بقى سيادة المشير من كام سنة لما ابتدا يطلع عز وللا جرانة وللا لما بدأ مبارك سياسة التوريث لجمال ... ليه موقفش ورفض يمكن ساعتها لو كان عمل انقلاب على مبارك مكانش دة حايبقى حال البلد ... بس السكوت دة بيثير علامات استفهام كتير وكل واحد بقى يخمن علامات الاستفهام دى ايه ... انا مش مسئول ...
فيه نقطة تانية صغيرة بس مهمة ... 3 جنود مصريين قتلوا برصاص الجنود الاسرائيليين ...
فيه كذا علامة استفهام فى الموضوع ...
الاولى ..: ليه الاسرائيليين قتلوا الجنود بتوعنا ... وايه الملابسات اللى ادت لده؟؟
الثانية ..: مين اللى ليه مصلحة فى اللى حصل دة ... هل اسرائيل عاوزة حرب مع مصر .. وللا فيه اصابع خفية ليها مصلحة فى الموضوع ... تجار السلاح مثلا .. او دولة مزنوقة وعاوزة تلم قرشين ..
الثالثة ..: على فرض ان اللى حصل حصل غلط ... او خطأ غير متعمد .. بما اننا عارفين ان الاسرائيليين جبناء بطبعهم ... وصباعهم على الزناد بشكل طبيعي ف مع اول طلقة تطلع من اى حد فى اى اتجاه اضرب فى المليان ... الناس اللى بتطالب بقطع العلاقات مع اسرائيل انا موافق على قطع العلاقات ... وموافق على الغاء تصدير الغاز لاسرائيل وموافق على شروط كامب ديفيد ... بس مش موافق على سحب السفير المصري من اسرائيل ولا على طرد السفير الاسرائيلي من مصر ... .... فيه مقولة سمعتها خاللى اصدقائك قريبين منك ولكن خاللى اعدائك اقرب .. ..
وكفاية كدة النهاردة
ليست هناك تعليقات:
إرسال تعليق