ازمة المرور فى مصر ... سلوك بشري

قد يعترض البعض ويقول ان ازمة المرور فى مصر سوء تخطيط واهمال من الحكومة وغيرها من الاسباب التى اراها موضوعية ولكنها ليست اساسية ، فهى فى رايي المتواضع ما هى الا سلوك بشري طبيعي فى ظل انعدام الاخلاق ... مجرد سلوك بشري محض ... كيف؟

اصحى الصبح ، اركب عربيتك ، امشي فى الشارع ، قف فى الاشارة ، عدي الاشارة ، اوصل شغلك ، اشتغل ، خلص شغلك ، امشي فى الشارع ، قف فى الاشارة ، عدي الاشارة ، اوصل بيتك ، اركن عربيتك ، ادخل البيت ، نام بقى .

موضوع سهل جدا ، مفيش ابسط من كدة ، صح ؟

طيب ، من ساعة ما خرجت من بيتك الصبح لغاية ما رجعت اخر النهار ، شتمت كام مرة وسبيت للناس كام مرة واتخانقت كام مرة وطلعت شغلك اتخانقت مع زمايلك كام مرة ولو انت مدير شديت مع مرؤوسيك كام مرة ولما رجعت البيت اتخانقت مع مراتك كام مرة وزعقت لعيالك كام مرة قبل ما تنام فى الاخر .

لو فرضنا انك عملت من كل تصرف من دول مرة واحدة بس فى اليوم ، شوف بعد اسبوع حتبقى حالتك ازاى ، حتروح للدكتور كام مرة فى الشهر ، وانعكاس دة على اهل بيتك وصحتك ايه ؟

طيب سالت نفسك انت بتسوق صح وللا لأ؟

طب سالت نفسك الناس اللى حواليك دي طلعت رخصة ازاى ؟

اجابة السؤال دة حتبقى اكيد زي ما حضرتك طلعت رخصة بالضبط ، اما واحد معرفة طلعهالك ، اما جاتلك على البيت ، اما دفعت فلوس علشان تتطلعها قوام وماتتعطلش .

وطبعا علشان متحفظش الورقة بتاعة علامات المرور اللى بتتباع فى ادارة المرور علشان تمتحن فيها ، واللى لو حصل دة يادوب بتحفظها وتخش تكرها واول ما تخرج ممسوحة باستيكة من دماغك ولا تعرف عنها اى حاجة .

طيب ليه الواحد فينا لما بيروح اى بلد اوروبي او خليجي بيبقى ماشي ملتزم ومحترم ؟

طب مسالتش نفسك ليه عن ازمة المرور اللى موجودة فى الدول اللى برة ؟

طبعا ناس كتير حتقول ان القوانين هناك صارمة وشديدة والغرامات عالية .

طيب هوة انا لازم يبقى فيه قانون من الدولة يحكمنى امشي كويس وابقى ملتزم ؟

حيرد واحد ويقول افرض انا التزمت اعمل ايه فى البهايم اللى حواليا؟

ازمة المرور برة تختلف عن ازمة المرور جوة كتير .. فرق السماء من الارض.. ليه ؟

برة الناس ملتزمة منها فيها ، الالتزام بيجري فى دمها ، الزحمة ليها وقت لا يزيد سواء الصبح وهما رايحين اشغالهم او بعد الظهر وهما مروحين بيوتهم .

عندنا فى مصر بقى حدث ولا حرج ، فجأة الشارع فاضى ورايق وفجأة الشوارع واقفة ، الاشارة حمرا وانت مش فاضى تقف تخرم من شارع جانبي وتلاقى نفسك برضه واقف فى الاشارة بس لازم تقف فى الاول علشان تخرج الاول ، تريللا ماشية على الشمال عادي خالص عدي من يمينها وكمل طريقك ، تريللا ماشية وسط الطريق ولا يهمك يا بوب يمين فى شمال بقيت قدامها ايه المشكلة ، واقف فى اشارة العربية اللى وراك ريحت عليك تنزل ويلعن تيت على ابو تيت على تيت واللى يشوف الفرح اللى انت عامله ميلاقيش اى حاجة خالص ، بلس ليه هوة كدة خدوهم بالصوت ليغلبوكم .

طب لو كل واحد حصل معاه الموقف دة نزل وشاف انه مفيش حاجة خلاص حصل خير خاللى بالك امشي بالراحة ابتسم فى وش اللى قدامك حتاخد اللى انت عاوزه حتى لو كنت غلطان ، يا اخي تبسمك فى وجه اخيك صدقة ، وبعدين تضمن منين ان اللى حاتنزل تزعق معاه دة مايطلعش فرد خرطوش يناولك بيه طلقة فى دماغك يجيب اجلك ، استفدت ايه انت بقى ؟ ولا حاجة يتمت عيالك على الفاضى .

طب ليه بقى ما نلتزمش ونمشي عدل بلاش تكسر اشارة ولو حد جنبك كسر عليك انصحه بالشويش حتى لو مسمعش النصيحة .

ابدا بنفسك علشان غيرك يقلدك ، الناس بتبص لبعضيها ، مراتك بتعمل زي ما انت بتعمل وعيالك واخواتك وزي ما انتوا بتعملوا الناس بتعمل زيكم وهكذا لغاية ما الشعب كله بيعمل زي بعضه ، وفى الاخر مش عارفين ازمة المرور فين ...؟

اناا عارف ان تخطيط الشوارع زي الزفت ، وعدد العربيات كل يوم والتاني بيزيد والشوارع ضيقة زي ما هيا ، وياسلام بقى لو شوية مطر نزلوا فى الشوارع والشوارع غرقت مية والمترو مش شغال والانفاق المية فيها توصل لمتر يبقى راحت فلوسك يا صابر ..عربيتك باظت والدنيا خربت ، المجارى مسدودة وانفاق الامطار مسدودة والشوارع مسدودة والبلد بقت مقفولة بالضبة والمفتاح ومافيهاش مخرج.

بس مهما كان لازم نلتزم بالصح ونسيب الغلط .

ومسالة الالتزام دي كبيرة قوى علشان نتكلم فيها ، لو كل واحد اتعلم اداب وقواعد المرور صح والتزم بيها عمر ما حايبقى فيه واحد ماشي فى الشارع غلط ، لو بقت اجراءات الرخصة اجبار فيها ان الواحد يتعلم قواعد المرور صح عمرنا ما حنلاقى سواق ميكروباص ماشي غلط .

لو كل واحد فينا التزم ومشي صح ، اكيد مش حايبقى فيه بهايم....!!!